追思

媽，五月十六臨天光，掌汝歸夜，厓目珠澀澀，有息悿。看汝小可較好睡兜仔，厓行去全家便利商店買咖啡摎パン。天時涼涼，挑挑行較遠兜仔，準運動。行轉來803病房，堵好出日頭。企到窗門脣看往出，日頭濛濛燒燒，街路還吂知醒。媽，思念斯像一枝針，囥在心肝肚，動啊到使刺著人孲孲噭。好得有這幅汝離開前一日个日出光景，見想到汝，厓試到心肝頭多一息息燒暖摎希望。

厓斯掌汝一夜定定，正經掌汝等多係阿哥。舊年過年開始，汝有病痛，一直到前日晚晡，阿孚逐夜摎汝共下睡。哥沒多話講，總係頭擂擂緊做。阿姊金蓮等好吩附，一通電話，買魚買肉，麼介買便便。滿女牡丹嫁暢遠兜仔，好得佢摎汝等有話講，做得講電話，講當久。媽，厓識問汝，心臼仔有麼介怨歎麼？汝講「總愛子兒有書讀，有頭路做，斯好咧。」這下厓兄弟姊妹四儕，四介心臼婿郎美玉、玉幸、堂鈞、文榮，各各安樂。阿偉、阿鎮、心妍、晨晨、小毅、筱筠、智雄、國謙、緯婷、柏沅，十介內孫外孫，續等成家立業，幸福快樂。媽，厓想汝一定沒怨歎咧。

頭下出門，厓兜問爸愛來送汝麼？佢講沒愛好咧，加艱苦定定。媽，汝食幾多歲，汝兩儕斯熟事幾多年；到今年，汝兩公婆結婚七十年咧。爸講話大嫲牯聲，毋過汝正經愛做麼介，佢無第二句。四十年前，恩伲屋下買屋整屋，汝總係講「若爸認做事，厓煞猛舂錢」。汝種菜，佢改園；兩儕騎等歐多歪，毋單淨市場、親戚屋下或者醫院，山林壁壢角滿埕乜去得到。

媽，敢有下一生人？汝頭擺㓾雞捋鴨，總係講「做雞做鴨沒了時，下二擺去做有錢人个子兒」。媽，下一生人汝愛來做厓个子兒。厓會教汝講第一句話，攬等汝，聽鄰舍講汝「很媸喔，得人惱仔得人惱」。還愛教汝讀書寫字，食好著好。還會教汝，毋好再過恁憨咧，毋好斯知好克虧自家，對別儕暢好。

媽，汝這下沒病沒痛，莫愁莫慮；好跈等佛祖，恬恬行去。想到汝摎阿公阿婆姊公姊婆團圓，厓兜乜跈等歡喜。媽，歡歡喜喜，行等去。

心肝子阿師代表阿蓮阿孚牡丹一仝甲辰年四月廿日

- 聆聽音檔 🎧