•2019年1月15日 星期二,晚上9:24
友善列印
戇姐婆換題目
序陳美燕《新竹風》詩集
第一擺看到美燕係在交通大學客家學院在職碩士專班个新生座談會，斯像佢个名美燕，靚麗端莊。毋過聽忒自我紹介以後，頂記得係日文專長還過海陸客語。修過幾門課後，美燕尋厓指導碩士論文，厓建議佢發揮這兩項專長，兩儕黏決定以竹東為語料範圍，研究海陸客語个日語摎原住民外來語。
計畫順利通過，開始蒐集語料，乜固定安排討論時間，續漸漸發覺語料有限，盡難超過前賢成果；又恁堵好，美燕好命會做戇姐婆咧，孤不離將暫時放忒研究。某日，面書頂高看到好消息，外孫一出世佢斯教外孫講客。看到詩作「戇姐婆」，厓心想「壞啼咧，恁才情个學生會分厓害到。」當下留言：「美燕啊，將就來改題目好咧！」
事實上，美燕考慮碩士論文方向該下，已經同厓提起「敢做得用客家詩創作个形式畢業？」當時厓認為實作式論文係為著專業人士設計，佢吂係恁仰形个身份，所以沒答應佢。看到佢以身份轉換而開始生命个寫作，厓正幡然改悟，答應佢之前个想法。
美燕个作品慣寫親情，阿公阿婆、妹仔、婿郎，寫到親切、幽默又餳人目汁。〈跈阿公去看戲〉斯像貼等阿公背囊，目睡摸瞎；〈沙鼻嫲摎暮固狗〉灶下行到膨凳，笑開弛弛；〈偷走〉沒走个係腸牽肚掛。
因為寫詩，美燕結到一群細妹伴，厓乜常常笑佢：「敢一定愛恁乖嗄？仰毋讀兜女性主義个書？」佢總係笑笑講好。背尾，〈掛紙〉斯係這種轉想過後个心情。
出版這本詩集以後，美燕个人生乜應該多多少少換題目咧，各位試看〈厓到該欉花樹下等你〉，美燕沒講係麼儕等麼儕，厓想啊，一定係戇姐婆等細妹拐！毋知讀者仰般看？
 |
| 感謝張典婉攝影 |
0 留言: